حرم کا تعارف | رواق حضرت فاطمہ زہرا علیہا السلام

رواق حضرت فاطمہ زہرا سلام اللہ علیہا

رواق حضرت فاطمہ زہرا سلام اللہ علیہا حرم امام رضا علیہ السلام کے ان مخصوص رواقوں میں سے ایک ہے جو خواتین کے لیے مختص ہے۔ یہ رواق 19 جمادی الثانی 2017 کو حضرت فاطمہ زہرا سلام اللہ علیہا کی ولادت باسعادت کے موقع پر آستان قدس رضوی کے متولی کی موجودگی میں دوبارہ زائرین کے لئے کھولا گیا۔

رواق حضرت فاطمہ زہرا سلام اللہ علیہا حرم مطہر رضوی میں صحن آزادی کے زیریں حصے میں تعمیر کیا گیا ہے، جس کا داخلی راستہ بستِ نواب صفوی میں صحن ہدایت اور صحن کوثر کے درمیان واقع ہے۔ اس رواق سے ایک دروازہ رواق دارالحجہ کی طرف بھی کھلتا ہے۔

زائرین کی آمد و رفت کو خصوصاً رش اور ازدحام کے ایام میں آسان بنانے کے لیے اس رواق میں ہنگامی اخراج کے تین دروازے بھی بنائے گئے ہیں۔ وضو خانہ، برقی زینے اور اسلامی طرزِ تعمیر کے مختلف ستون بھی اس رواق کی دیگر خصوصیات میں شامل ہیں۔

رواق حضرت فاطمہ زہرا سلام اللہ علیہا کے قیام کا مقصد مسلمان انقلابی خاتون کی شناخت کو واضح اور بلند کرنا، زائر خواتین کے لیے خصوصی پروگراموں میں شرکت کو بڑھانا اور ان کے معیار و مقدار کو بہتر بنانا، خواتین میں حضرت فاطمہ زہرا سلام اللہ علیہا کے طرزِ زندگی اور سیرت کو رواج دینا، نیز زائر خواتین کی زیارت کو مزید گہرا، عام اور آسان بنانا ہے۔

رواق کے پروگرامز

اس رواق میں مختلف مذہبی و ثقافتی پروگرام منعقد کیے جاتے ہیں، جن میں خواتین کے لیے اعتقادی موضوعات پر خصوصی حلقہ ہائے معرفت، فارسی اور عربی زبان میں خواتین سے متعلق شرعی احکام کی تعلیم، قرآن و اذان، نماز جماعت، زیارت کی قرائت، قرآن کی ترتیل و تدبر، قرآنی محافل، اسلامی طرزِ زندگی کے موضوع پر دینی تقاریر و گفتگو اور حضرت فاطمہ زہرا سلام اللہ علیہا کی سیرت کا بیان شامل ہیں۔

رواق حضرت فاطمہ زہرا سلام اللہ علیہا کے دیگر پروگراموں میں بچوں اور نوجوانوں کے لیے مترجم کے ہمراہ خصوصی حلقہ ہائے معرفت، تمام اوقات میں بچوں کے لیے خصوصی پروگرام، نیز فارسی اور عربی دونوں زبانوں میں زیارت کے آداب کی تعلیم شامل ہے۔

اس رواق میں حرم امام رضا علیہ السلام کی زائر خواتین کو مختلف خدمات، مثلاً کفش داری، صفائی وغیرہ، خواتین رضاکار خادمات کے ذریعے فراہم کی جاتی ہیں۔